Aaknh khuli toh sapna toota
Dil ka connection dimaag se choota
Ek naye din ki dastak par
Hum nikaley ek naye safar par
Lakho ki bheed mein ek chehara apna bhi hain
Armano ki fehrisht mein ek irada apna bhi hain
Tanha nahi main
Saath hain ek humsafar aisa bhi
Ek suni si awaaj ki sohabat
Jisasey hujuum mein mila ek thikana bhi
Uss awaaj ki aad mein main
Kudata fandata, sapno ko sambhalta
Iss shehar ke gaddho ko langhta
Pahucha din ki pehali manzil ko
Waha khada ek naya sangram mila
Kashamakash ka ek sailab umada
Magar dil ne udhadey sapno ko sila
Aandhi mein bhi umeed ka deepak na bujha
Aur kahi se phir vohi awaaj
Iss shehar ki baarish ki tarah
Rom-rom mein utar gayi
Angdayi ki tarah libaas badal kar
Kuch yaaron ke beech pahuch
Mainey bhi ek cigarette jalayi
Chaupati par baithey baithey
Aati jaati leharon ko dekhatey
Ek soch si mann mein aayi
Koso safar karke leharey
Iss shehar se milney aati hain
Thukrata hain yeh shehar inhey
Lekin yeh himmat nahi harti hain
Toot kar choor ho jati hain chattano par
Magar phir bhi laut kar aati hain
Main bhi iss manaviya samundar ki lehar hi toh hu
Meri manzil yahi hain, mera safar bhi yahi
Iss hamesha bhagtey shehar ka
Ek pahiya main bhi toh hoon.
Thakawat se choor shareer ko jab
Ijajat di mainey araam ki
Ussi awaaj ki geharaiyo mein doob
Palkey sajaney lagi sapney fir kai
Ek din dhoond loonga khudko
Iss shehar ki bheed mein
Lekin darr hain pa kar kho bhi doonga
Paaney ki koshish mein zindagi ko
Magar taaro ki timtimahat Mujhko manjoor nahi
Khud taara bananey ki chaahat meri hain
Manzil ki daud mein sapney peechey hain mana
Lekin iss shehar ki haqeeqat sapno se hi hain
No comments:
Post a Comment